Khan alijibu "kwa shauku" kwa pendekezo
Mwanamume mmoja anatuhumiwa kupanga njama ya kumuua mwanablogu wa Kipakistani anayeishi Uholanzi na amefikishwa mahakamani London.
Ilisikika kuwa Muhammad Gohir Khan mwenye umri wa miaka 31 aliajiriwa kama "mpiga risasi" na watu kadhaa.
Inaaminika kuwa watu hao wanaishi Pakistan.
Khan alikamatwa mnamo Juni 2021 na akakana hatia ya kula njama ya mauaji.
Wanasheria walisema mwathiriwa aliyekusudiwa, Ahmad Waqass Goraya alikuwa ameanzisha blogu ya Facebook, akikejeli jeshi la Pakistani na kuelezea madai ya ukiukaji wa haki za binadamu.
Bw Goraya aliishi Rotterdam wakati huo.
Mahakama ya Kingston Crown ilisikia kwamba Bw Goraya "alijulikana kwa kuzungumza dhidi ya shughuli za serikali ya Pakistani na inaonekana kulengwa kwa sababu hiyo".
Khan alikuwa mfanyakazi wa maduka makubwa kutoka London Mashariki.
Mahakama ilisikia kwamba alikuwa na deni kubwa.
Kulingana na waendesha mashtaka, Khan alijibu "kwa shauku" pendekezo la mwanamume aliyejulikana kama 'MudZ' la kumuua mwanablogu huyo wa Pakistani kwa kubadilishana na £100,000.
Akiongoza mashtaka, Alison Morgan QC, alisema mnamo Desemba 2018, Bw Goraya alipokea habari kutoka kwa FBI kwamba alikuwa kwenye "orodha ya wauaji".
Pia alipokea vitisho mtandaoni na ana kwa ana, ambavyo baadhi yake aliamini "vilikuwa vinaratibiwa na ISI (Inter-Services Intelligence)".
Mahakama ilionyeshwa jumbe zinazodaiwa kuwa ni za Whatsapp kati ya Khan na mtu wa kati aitwaye 'MudZ' wakijaribu kujadili mauaji hayo kwa madai ya kutumia kanuni inayorejelea uvuvi.
Wakati mmoja, Bw Goraya alitajwa kama “samaki mdogo” kinyume na “papa” na kwamba “kisu kidogo… ndoano” ingetosha kwa kazi hiyo.
Mtu mwingine aliyetajwa katika jumbe hizo kuhusiana na madai ya njama hiyo alijulikana kama 'Big Boss'.
Upande wa mashtaka ulieleza kuwa mshtakiwa alikuwa ametumiwa anwani ya nyumbani ya Bw Goraya na picha yake.
Khan alisafiri hadi Rotterdam ambako alinunua kisu, hata hivyo, hakuweza kumpata Bw Goraya. Kwa hiyo, alirudi Uingereza ambako alikamatwa.
Bi Morgan alieleza kuwa Khan anakubali kutuma na kupokea jumbe zote zinazohusika na kusafiri hadi Rotterdam lakini anashikilia kuwa alinuia kuweka pesa na sio kutekeleza mauaji.
Upande wa mashtaka unadai kuwa alikusudia kutekeleza mauaji hayo.
Kesi hiyo inaendelea na inatarajiwa kudumu takriban wiki mbili.
Loading ...